Ab Tou Ghabra Kay Kehta Hai Dil [An imaginary city of peace]
Ab tou ghabra kay kehta hai dil
Ho koi aesa shehr
Jahan bai daregh
Lahu yun hazrat e insaa’n ka
Bhaya na jata ho
Jahan izzat e nafs
sar e aam ruswa na ki jati ho
jahan siyasat kay akha-rhay mai
zameer ka souda, kia na jata ho
Ab tou ghabra kay kehta hai dil
Ho koi aesa shehr
Jahan khouf kay surmayee abar
Yun sar pay mandlatay na hoon
jahan nunhay masoom atfaal
chaman mai janay say katratay na hoon
Jahan qalam hatyaroon say
Shatranj ki bisaat par
Maat khatay na hoon
Ab tou ghabra kay kehta hai dil
Ho koi aesa shehr
Jahan do waqt ki roti
Har shikm ko maee’sar ho
Jahan jismoon ko dhaaknay kay liye
Libaas e zaroorat dastyaab ho
Jahan har fard kay sar pay
Aik adad sai’baan ho
Jahan mazhab ki tafreeq na ho
Jahan ta’sub ki khareed na ho
Jahan kay akhbaar
Khushi ki naveed sunatay hoon
Jahan ka iblaagh aamaan
Mussarrat ka paish khema ho
Jahan qalb ko tasalee ho
Jahan rooh ko itmenan ho
Kaanch say banay us shehr mai
Surat kay bajaye seerat ka palrhah bhari ho
Jahan mayousi qareeb say bhi na bhatakti ho
Jahan fikr e mustaqbil zara sa bhi na tharakti ho
Jahan ki libraries mai khalqat ka hujoom ho
Jahan haqeeqi ilm har shaksay ka perfume ho
Jahan asli degree chalti ho
Jahan rishwat or sifaarish jalti ho
Us shehr ki lughat mai
Qatal o gharat gari
Chori, daka or reh zani
Muzahiray or ziadti jesay
Mukruh alfaaz na hoon
Jahan jhoot na bola jata ho
Jahan insaaf na Tala jata ho
Jahan zeest mai kuch kami na ho
Jahan aankh mai dhundli si namee na ho
Haye
kaaaashhhhhh !
Koi aik khayaloon ka shehr
Hum aesa bhi banalatay
Jahan
puranay Dehli ki si tehzeeb hoti
Lahore ki zinda dili hoti
London ki qadamat parasti hoti
Paris ka sa romance hota
Prague jesa dilkash raqs hota
Istanbul ka sa manzar hota
Oslo jesi dilruba barq girti
Rio jesa muaj mela lagta
Amsterdam jesi bai fikri hoti
Venice jesi aabi rah guzr hoti
Toronto ki si khush haali hoti
New york sa rat jaga hota
Tokyo si riwayat dari hoti
Beijing ki takhleeq kari hoti
Jahan Afraad aman ki fasal kaat-tay hon
Jahan sab rawadaari ki chocolate bant-tay hon
Poet: Zubair Siddiq
RAHAT E WEEKEND [a lyrical prose for weekend freedom]
kis qadar sukoo.n hai ta’ari
aaj meri hasti ki bazm main
kitni taskeen aamaiz hai rooh
weekend ki anjuman main
har aik shai say romaan jhalakta hai
tamaniyat ka jaam chalakta hai
aaj chutti say kuch lamha qabal
aik anjaana sa tabassu’m
laboo.n pay kis shaan say saj gaya
shaam ka yeh munfarid pehr
kitna suhaana lagta hai
fizzaah mai bihkri
naghmagi pay
raqs karnay ko mann karta hai
traffic jaam or signal kay band honay par bhi
tayesh mujhay aata nahi
Haath phailaye in paishawar gadagaroon say
aaj mai uktata nahi
rehguzr ka aik aik morh mehkta hai
Haftay bhar qaid e ba mushaqat ka aseer
aaj bai hisaab chehkta hai
ghar pounchnay par
kiun aaj kisi thakan ka ehsaas nahi
kiun aaj chaiki talb-e-khaas nahi
bai fikri kay saath yun TV dekhna
kitna dil afza hai
mehbooba kay saath texting mai
dil ka behkna
kitna khushgawar ajza hai
Facebook ka ang aaj nirala hai
rafeeqoon ki majaazi saknaat par
dilchasp tabsaray chal rahay hain
muskurahat ka hai yahan dowr dowra
nit naye shugufay khil rahay hain
Twitter ki TL aaj kuch sust hai
tweeple ki haqeeqi zindagi aaj kuch chust hai
wilayat mai reehaish pazeer aapi say
Skype par guftugu ka silsila achoota lagta hai
weekend ki khushnuma ranayeeoun mai
har ehsaas salona lagta hai
meri zaat say chimti grumpy cat or chirh chiha pan
hawa mai bukharaat ban kar urh gaya
tund khowhee ki dozakh sard parhi
aaj mai har aik rishtay say jurh gaya
pizza, ketchup or coke
ghar waloon kay saathy meethi meethi nok jhook
ammi ki wohi riwayati rok tok
aaj shab bahir mat jana
theek nahi hai barkhurdaar ab zamana
unki is fikr ko qehqay mai urhana
mutter-gasht kay liye tayyar hojana
bahir ki dunia mai alag sama’a hai
qous-e- qazah ka rung jama’a hai
haseenayoon ka towlaa idher udher hai ghoomta
har nafs hai aaj faraghat mai jhoomta
nazroo.n ko kheera karnay walay manazir hain
zeest ka lutf hasil karnay walay haazir hain
jee karta hai maahir akkas ki manind
hoshruba koi pal apni mutthee mai bheench loon
DSLR[550D] camera say aik shabee kheench loon
dhaboo.n pay bethay mukhtalif noujawa’n
walandezi andaaz mai deengai maar rahay hain
apni qabliyat or fehm ka roub jharh rahay hain
sharaaho.n par tezi say guzrti garhiya’n
jumood torhay ja rahi hain
hayat mai farawaani or harkat ka
nayab ehsaas dila rahi hain
kuch cinema gharoon ka ticket hain dhoondtay
bai takalou’f jorhay khuloot hain dhoondtay
jab andar ka mousam ho jazaiba
har baat qalb ko bhaati hai
talkhiya’n bhi lagti hain shireen
gard bhi nikhr nikhr jati hai
sochta hun itmenaan ki yeh jannat
itni mukhtasar kiun hai milti
shaad-maaani ki muddat kiun tehleel hojati hai
pareshaani phir hazrat e insaa’n ki mehfil hojati hai
rahat ki yeh gharhi baish baha naimat hai
monday to friday phir aik naye zehmat hai
weekend ka anmol dourania jald guzr jata hai
khafaqaan ka aftaab phir say ubhr jata hai
shayad yehi is jag ki reet hai
ranj or qarar apas ka geet hai
Poet : Zubair Siddiq
#TimeUrdu signature ghazal [IV]
“Talatum e Azurdagi”
fehm o farahsat main dichasp nikhr gaya
dukh o aalaam main jab say ghir gaya
joorhay huwye tha jou qasrr -e- ehbaab
sitam gari say woh shiraza bikhr gaya
jaanay kis nay cheen lia uska tabass’um
Haye! kon zalim zindagi mai takr gaya
dekhta hai ab aks e ranjeeda ainay main
yunn dunia kay mataabiq sanwr gaya
phailata tha taza shagufaay eitraf mai
nahi maaloom woh zubair kidhr gaya
Poet : Zubair Siddiq
Kash Kay Hum Bhi Jo Hotay Snowman⛄
kash kay hum bhi jo hotay snowman
koi ishwa pardaaz haseena
barhay chaao kay saath
narm o nazuk haatoon say
takhleeq hamain karti
bhar bhar mhutthee
barf aik jaga jama’a karti
woh naazneen inhemaak say
nain naqash hamaray muzayeeyan karti
rikaabi chehra kuch yun sajaati
button ankhoon ki jaga lagaati
aik cone icecream khaye huye
us say sutwa’n si naak banaati
laal aik ribbon
hontoon ki jaga chipkaati
bhara bhara
gol matol sa
jism hamara hota
woh dilruba paikar
apnay lams say hamain
zindagi ka thorha bohat
ehsas dilaati
apnay boyfriend ka muflar
woh hum pay daal deti
kuch dair jazbaat bhari nazroon say
hamara deedar karti
phir
dunia ko hamaray muta’liq
kuch yun aagah kia jata
iphone say tasweerain kheench kar
instagram pay upload kiya jata
Facebook pay hamari tareefo’n ka
aik dilchasp status lagaya jata
twitter pay hamari shaan mai
bai shumaar qaseeday parhay jatay
hamara tazkira khoob likness samait ta
favorites ka aik anbaar hota
whatsapp pay khusr phusr ka
aik dilkash dowr chalta
uski nazdeeki saheliyaan
hamaray qurb kay liye machaltin
unki yeh tarhap us haseena ko
mazeed maghroor banati
woh
khoob khilkhilaati
khoob itraati
apnay mehboob ki bahoon mai simut kar
woh hamara bhi jee jalaati
na hum dekhtay na hum suntay
na ranjoor say bhara qalb hota
zamanay ki soubatoo’n say aari
kash kay aesa bhi koi maskan hota
kuch pal saath bitaanay kay baad
woh humnasheen wahan say chalay jaati
hamain aik ajab si wehshat hoti
hamain aik ajab si yaad sataati
raat bhar sard hawa’ain
hamaray jism mai paiwast hojatin
phir bhi hamain na coffee ki talab hoti
na kashmiri chai hamain garmaati
din bhar sakin halat ki wajah say
thori dair ghunudgi ta’ari jo hojati
ankhoon mai bus khala’a hi khala’a hota
na koi khuawab aata na koi suhana sapna hota
hum apnay mustaqbil ki fikr say
mukammal ghafil hotay
kash aesi bhi koi tarkeeb hoti
kash aesay bhi koi tareeqay hotay
aftaab ki pehli kiran
qayamat ban kar naazil hoti
din deeharhay hum pay daka parhta
roshni hamain raas na hoti
jo pighal kar
phir say hum barf ka dher banjatay
na kisi pay koi farq parhta
na kisi pay koi as’r hota
kash kay hum bhi jo hotay snowman
Poet : Zubair Siddiq
#TimeUrdu signature ghazal [III]
“Tamasha-e-Hasti”
nakam lamho’n kay sath kuch hounslay hain
shajar pay jis tarnh’a wiraan ghounslay hain
asooda waqt buss ab namudaar hua jata hai
kitnay dil faaraib insaan kay dhakoslay hain
kisi ko kia parhi jo hamaray bagher marjaye
kitnay banawati rishton kay chounchlay hain
bazahir barhay khush mizaaj nazar atay hain
zaat mai undroon say kis qadar khoklay hain
kashkol ana’aon ka lai kar ghoom rahay hain
zubair yeh haseen log kis qadar doghlay hain
Poet : Zubair Siddiq
#TimeUrdu signature ghazal [II]
“Talkhi-ye-Zeest”
kia hi khoob ehtaimam kar rahay hain
khamoshi say jou kaam kar rahay hain
manzil e maqsood hai pehnawaa jinka
khaas kar din ko shaam kar rahay hain
taarhap ki qindeelain agarchay roshan
zaahir magar iltaiyaam kar rahay hain
paiwast hain rooh mai kaye talkhiyaan
muskuraahat ka ilzaam kar rahay hain
khalqat kiun nahi parhti aankhain inki
uljhanoon ka jo anjaam kar rahay hain
bai faida’a hee hain teray alfaaz zubair
konsa log tujhay salaam kar rahay hain
Poet : Zubair Siddiq
corporate slavery [a modern expression for Urdu poetry]
subha kisi pehr
jab ankh khuli teri
zehn o qalb ko bojhal sa paya tunay
jesay sari raat
iltiwa’a mai parhi guzarishaat ki fikr
la shaoor ki deewar pay
haatorhay say barsati rahi ho
thorhay pal tabiyat ko
amaada karnay mai guzray
phir
aik lamhay himmat karkay
neem madhosh ankhoon kay saath
nikla apnay shabistan say tu
rahat kay woh baish baha pal gawan kay
jin ki koi qeemat nahi
jin ka koi karobaar nahi
chala hai tu
apnay din kay
aath ta paanch kisi or ko hawalay karnay
aik sawal jo mai pouchoon tum say
aik baat kia batlaoon gai tum mujhay
akhir yeh kesi
pabandiyaan hain ?
akhir yeh kesi
ehsaas ki hathkarhiyaan hain ?
akhir yeh kesa
majaazi jabr hai ?
akhir yeh kesa
un dekha zindaan hai ?
yun lagta hai
jesay
shift manager hi tera
imaam, maseeha or nijaat daheenda thera
apnay cubical mai
tu yun baitha
ho koi
zameer ki adaalat ka kathera
shumariyat ki zindagi jee rahay ho tum
graph ki zindagi mar rahay ho tum
ik lamhay ko tou socho
akhir yeh sab kia kar rahay ho tum
kia yehi maqsad e hayat thera
kia yeh hi hai ashraf ul makhlooqat ka bikhaira
yeh auhday jo tunay apnay naam kay agay rakh liye
khoob is say dil mai khush hotay ho tum
berhiyaan agar chay nazar aati nahi
magar haqeeqat tou yeh hai
ghulaam ibn e ghulaam ho tum
kia farq hai us dor e jihalat or ismai
sacch yeh hai
ghulamana soch tou kia
ghulami ki pairwee bhi na gaye
aay aadam zaat
tu azal say yunhi chakki mai pista raha
par qusoor kuch tera bhi hai
qusoor kuch teri saadgi ka bhi hai
yeh sab teray hi banaye huye
towr tareeqay hain
is nafsa nafsi ka sabab
darasal tu khud hai
kia teri takhleeq ka maqsad
faqt yeh chaakri tha
kia tera baish baha takhyeeyul
samraaji nizaam ki baandi tha
yeh jo teri qeemti hasti rul rahi hai
filoon kay oraaq mai ghul rahi hai
khuda say bhi hai tu dur
makhlooq say bhi baizaar
kiun kar ho phir paida
wujood mai zindagi kay asa’ar
afsos tou yeh hai
office auqaat kay doraa’n
kaam kay bhonchaal mai
najanay kitnay haseen pal kho deta hai
kia dekh sakta hai tu
karwaan e zeest kay gulshan main
kesay anokhay tamashay lagtay hain
kis tarnha rung barangi titliyaan
phooloon kay saath laad karti hain
kabhi mushahida kia
kis tarna koi chirya lagan kay saath
ghonslay kay liye pehla tinka chunti hai
kabhi tajasus hua
asmaa’n kesay kesay rung badalta hai
badloon ka kesa dilkash dour chalta hai
patli patli galiyoo’n mai
nanhay masoom bachay
apni totli zabanoo’n mai
chaand huroof kheltay hain
mai tou kehta hun
darasal teri naukri tera qafas hai
or thori si asharfiyaan tera sayyad
na tu furhsat kay mai khanay say aashna
na kisi itmenaan ki bazm mai teri haazri
husn e jana kia hai tujhay ka maloom
gaisu e yaar mai guzri shaam kia hai tujhay kia maloom
wis’l ki dilkashi say bhi tu mehroom
hijr ki raat ka andhera bhi tujhay maeisar nahi
ghuncha e aana ki khushbu mai mast hai tu
dosroon ko haranay ki jung mai masroof hai tu
ho jo koi aaqil tou
matam karay teri mehmal soch par
ho jo koi dana tou
faqat yeh kahay tujhay
teray din kahan , teri raatain kahan ?
Poet : Zubair Siddiq
GORI MA’AM OR STUDY ABROAD KA BHOOT✈🎓
ghar kay baramdai mai faizan apni khilona garhi say barahy chao kay saath khel raha tha.jis mai jalti bhujhti rung barangi choti choti battiyan uska khoob dil lubhati.yeh khilona gari faizan ko uskay mamu nay bhijwayee thi jo bartania kay shehr birmingham mai muddat say qayam pazeer thay.mamu aksar wahan say apnay ladlay bhanjay kay liye mukhtaleef qism kay dilkash khilonay or lazeez chocolates bheja kartay jinhay faizan bohat pasand karta tha.nanhay faizan ki walda bhi ussay bartania walay mamu kay dilchasp qissay sunati or apnay susral mai sterling pounds ka roab jamawain thi.woh jab kabhi pakistan ka rukh kartay tou sab rishtay daar unki khoob aao bhagat mai masroof hojatay.logoon ki is izzat afzaye say faizan barha muta’seer ho jata.faizan jab bhi apnay mamu ki jazaiba taswerain dekhta tou un mai aik hashash bashash insaan nazar aaya karta.phir England say ta’alouq rakhnay wali sufaid chitti,resham jesay sunheri rung kay gaisou’n wali mumani ussay charming telcum powder kay dabby pay bani haseena ki tarnha maloom dikhayee deti.pas e manzar kay khoobsurat or hosh ruba manazir ussay apnay sehr mai giriftar kar letay.aik nanhi si khawhish dil mai moujzan ho jati kay woh bhi in sabz tilismi wadiyoon mai uchal kood machaye jahan uskay mamu chehl qadmi kar rahay hain.
amjad dettol kehta hai “yeh qalb aik bohat barha pinjra numa koi cheez hai.jis mai mukhtaleef rungoon kay pareendai tarnha tarnha ki surilee boliyaan boltay hain.darasal kano mai rus gholti yeh boliyaan khaw’hishaat ki boliyaan hain.aik chup tou dosra shuru,dosra chup tou teesra shuru.hum bawajood koshish in khawhishoon ki boliyoon say faraar hasil nahi karsaktay.hamain inhay sunn’a hi parhta hai.shayad yehi boliyaan apni ta’seer mai insaan ka indhan e rawan dawan hain”.
waqt pankh laga kar urhta raha.faizan kay shaoor,lashaoor mai mukhtaleef noeeyat kay badlao aatay rahay jo kay waqt ka ain taqaza tha.jab woh larhakpan ki umer ko pouhncha tou aik anjana sa ghair wabastagi ka ehsaas shiddat marnay laga.barhay buzrugoon ki taraf say bila wajah ki rok tok or baat baat par nuqta cheeni uski rooh par qehr ban kar toot ti.faizan ko apna hi ghar kisi zindaan ki tarnha mehsoos hota jahan uski azadi par berriyaan daal di gayen thi.aksar faizan apnay kamray ki khirki mai say harry potter wali gari ka intezar kia karta jo issay yahan say faraar ka rasta farhaam kar sakay.uskay or ghar waloon kay darmiyaan aik un dekha sa khalish ka diara khinchta ja raha tha.woh apnay dostoon ki thaat baat dekh kar yehi sochta tha uskay maa baap na tou uski zarooriyaat ko samajhtay hain na hi uski nafsiyaat kay qareeb tar hain.apnoon mai reh kar bhi woh zehni towr pay sutailoon jesa khud sakhta rawaeeya bardhast karta.yeh woh qarb hai jo kay aksar noujawano ka bunyadi masla hai.Harmones ki tabdeeli mizaaj mai chirh chirhay pan ka paish khaima sabit hoti hai.haath mai rakhi shai haqeer jabkay dur kay dhol suhanay lagtay hain.naseehat karnay walay ko insaan ankhoon hi ankhoon mai kaat khata hai.dosri janib suraj pay dastak dena mumkin si baat mai shumar kia jata hai.
faizan ab jawani kay un awaeel dinno main tha jahan kuch kar dikhanay ki taman’na karwatain lena shuru hojati hai.infiradiyaat ka samandar bhi dil main khoob thathain marnay lagta hai.desi rehn sehn mai paish aanay wali nit nayee hangama khezi ussay satati rehti.aman o amaan ki birgarhti surat e haal,harhtalain,qatal o gharat gari,la qanoniyat tou kabhi bunyadi zaroriyaat ka fuqdaan.algharz ussay is nasoor bood baash say nafrat si honay lagi.aik mas’hoor kun naqsh bartania walay mamu ki hansti muskarati shabeen aksar zehn mai ajati.baqool nasir kazmi “dil mai aik lehr si uthi hai abhi,koi taza hawa chali hai abhi” or qalb kay kisi goshaay mai yeh khayal ubher aata “england chaltay hain saray maslay khatam hojayen gai”.ird gird pheli mayousi ki waja say bahir janay ki khawhish nay or bhi pingay marna shuru kardiya.har baar mamu ki aanay wali skype call koyeloon par mazeed charbi tapkati.jab woh wahan kay goun gatay tou faizan ka sara wajood raqs karnay lag jata.woh dil hi dil mai urhan khatoolay ki umang kiye jata.ankh band kartay hi palak jhapak mai apni zaat ko abroad mai paye janay ki shadeed arzo karta.apnay saath honay walay na humwaar waqayat ko woh nainsaafi gardanta.phir dil mai yehi tajweez karta kay agar woh abhi aborad mai hota tou aesa nahi hota or wesa nahi hota.agar magar yeh woh haan nahi ki jung har waqt us ko sataye rakhti.bairoon e mulk janay ki khawish usko dozakh ka makeen kiye ja rahi thi.mua’shray mai mukhtaleef qism ki resha dawaniyaan,doghlapan usko khaye jata.saqafti,tehzeeebi or mashraqi rawadari jismani zaroriyaat ka rasta rokti mehsoos honay lagin.aksar tv channel badaltay waqt uski nazar kuch rangeen or shokh nazaroon par parhti,phir aik gudguddi abroad chalo ka shosha chorh kar na janay kahan gum hojati.
baqool M. Alvi sahab ~
kiun na mehkain gulaab ankhoon mai
hum nay rakhay hain khuwab ankhoon mai
faizan ko bahir mumaalik mai sabza hi sabza,khushiyaan hi khushiyaan nazar aati,har ja hanstay muskuratay khoobsurat gooray chittay angraiz uska istaqbal kartay.phir nihayat chulbulli,shararti gooriyaan chanchal isharay kartin,aik hasrat bhari fizah uskay tasaw’wur mai qaeem hojati.faizan thandi thandi aahain bharta,har pal yehi sawalaat sochta rehta kay kab woh bartania jaye ga ? kab woh hansti muskurati tasweerain facebook pay apnay dostoon or ghar waloo kay saath share ga ? kab khushiyan uskay angaan ka rukh karain gi ? jab kabhi woh apnay rafeeqoon say facebook chatting mai sahil e samandar pay mouj masti kay waqiyaat sunta tou hasad ka azhdha’a ussay zinda saalim nigal jata.
amjad dettol kehta hai “in samaajhi raabtoon ki websites nay hamain aesay insaano mai tabdeel kardia hai jo mamolee say mamulee waqaiyaat ko bhi barha mirch masala laga kar paish kartay hain.insaan mai ehsas e bartari ki dowrh kabhi bhi itni shiddat say nahi larhi gaye jitni kay ab.dosroon ko chowkanay ka chaska har waqt hamaray sar pay sawaar rehta hai.hum sab chotay chotay halqoon mai aik celebrity ban kar reh gaye hain.adam zaat ki boht sari harkaat ka talaouq aesay awameel say hota hai jis ki bina par iska tazkira logoon mai kia jaye.pus is kay liye hum koi bhi hatkanda apnanay kay liye tayaar hojatay hain.hum apni achoti tasweeroon or mowjouda halat e zaar say yeh batanay ki koshish mai lagay rehtay hain kay hamari zindagi ka mayar kis qadar buland hai.shayad desi noujawano kay liye aik adad fancy profile bananay ka sab say behtareen shortcut abroad jana hai”.
khair faizan nay jesay hi apna bachelors mukammal kia tou idher udher rafeeq o ehbab say bahir janay ka tareeqa e kar maloom kia.kuch din ILETS,Bank statement or fee deposit ki pareshaniyaan utha kar bila akhir bartania student visa par post graduate studies kay liye chala hi gaya.London Heathrow airport say nikaltay hi khunk hawa kay taza jhoonkay nay us ka istaqbaal kia.faizan kay liye ab duniya yaksar tabdeel ho chuki thi,har ja halla gulla karti khalqat,chakachownd roshni say bharpur neon glowing dance clubs,sondi sondi khushbu wali coffee shops or la tadad shokh o chanchal neem libaas gori ma’amain.woh suroor or kaif ki un manziloon say aashna ho raha tha jin kay baray mai aksar apnay abaye mulk mai socha karta tha.us kay liye haqeeqat or khuwaab mai imtaiaz karna mushkil hogaya tha.qudrat ka bai panha husn har ja bikhra parha tha jisay bartaanwi logoon kay nazm o zabt nay mazeed char chand laga diye thay.faizan ko pehli martaba bai fikri kay saath galiyoon mai yun azadana phirna bohat acha laga.
baqool shabnam waheed ~
nayee bahar ka tha muntazir chaman mera
jo us ka lams mila khil utha badan mera
kuch din tou wilayat ki albeli ronaq usay kafi bhali lagi.faizan nay yehi nateeja akhaz kia kay pichli manda zindagi shayad usnay kisi dozakh mai guzaari ho jabkay asal zeest ka lutf tou yahan hai.phir faizan university kay muamlaat or choti moti juz waqti naukri ki talash mai kashmakash ka shikar sa hogaya.ahista ahista zindagi ussi bai zariyat ki janib maeel honay lagi jiska faizan pakistan mai shikar tha.parayai mua’ashray ki waja say udaasi or akailaypan ka ehsaas shiddat ikhtiyar karna shuru hogaya.faizan ki aana kay bout tou is hi din toot gaye thay jab usnay guzr basr kay liye aik intehaye mamooli si odd job ikhteyaar ki thi.woh baat baat par bartania ki har cheez ka apnay mulk say muwazna karta or is amal mai dhori shakhsiyat ka maalik banta ja raha tha.is mada parast,jins kay haizay mai mubtila hujoom ko qareeb say dekhnay par faizan ko bara ta’ajub hua.ussay is baat ka idraak ab honay laga kay yeh shara’ahoon par zair lab tabassum say bhar pur chehray walay angraiz dil mai desi logoon say kitni adawat e qalbi rakhtay hain.samraaji nizam e hukoomat nay in angraizoon ka sab kuch girwi rakh lia hai.yeh sab kisi robot ki tarnha aik haftay kaam karkay do din may pagal kar dainay wali jalooti khushi mai apni sari kamaye luta baith tay hain.maghribi tehzeeb ki misaal otaaq kay us qaleen ki si hai jo upper say saaf shafaf nazar aanay kay bawajood teh mai say bai inteha gard alood hota hai.phir jis raat zair e zameen tube service mai kuch obaash ghundoon nay ussay zad o koob kia tou faizan ko us waqt ehsaas hua kay dunia kay tamaa’m baray shehr apni ravish mai yaksaan hain.faizan ko reh reh kar apnay mulk ki aik aik cheez yaad aanay lagi.bhala itnay barhay barhay grocery marts mai ussay andleeb chaliya kahan dikhaye deti.woh ab maa kay haath ki bani moong ki daal tak ko taras gaya tha.ussay apnay kanglay dostoon kay saath udhaar par dhaabay ki doodh patti chai or dair tak idher udher ki tafreeh ab pardais mai kahan milti.haftay ki raat gali mai khelay janay wala cricket match ka shor kisi gheray sanatay ki tarnha uskay kanoo’n mai goonjta.
amjad dettol kehta hai “zindagi apni fitrat mai tabdeel hoti rutoo’n ka naam hai chunacha hum kisi bhi lamhay ko munjamid karnay kay ehal nahi.guzri hue zindagi ka aam sa pal bhi qeemti maloom ho sakta hai shayad insaan har us cheez ko foqiyat deta hai jo uskay bus mai nahi rehti”.
meethi or bakra eid par bai rukhi kay saath ghoomtay angraiz uski ankhoon mai khutaktay.faizan chahata inka giraybaan pakkarh kar pounchay kay woh kiun us say galay nahi miltay.phir jabran goroon kay wilayati tehwaroon par banawti muskurahat liye idher udher pur ronaq galiyoon mai mutter gasht kia karta.is baat mai koi shak nahi kay faizan ko bartania mai taleem kay maya’r mai wazeh farq mehsoos hua magar woh har pal yehi sochta kia waqaye woh yahan nisaabi sargarmiyoon kay liye aaya tha.kahin aesa tou nahi us ko bhi bartania mai tassawu’rati”ab e zayal e gham” ki talab ho jis kay peenay say phir insaan ki zindagi mai koi ghum nahi rehta.faizan jin pareshaniyoon say farar chah raha tha woh tou uski soch kay saath hi chimti thi phir bhala shehr tabdeel honay say un mai aesi konsi kami ajaani thi..woh ab un awameel ki taraf dhiyaan dena laga jo us ko hazaroon meel dur khench laye thay.faizan sochta akhir hum desi log kis koh e kaaf ki pari ka intezaar kar rahay hain jo aik charhi ghumaye or hamaray saray masaeel hal hojayen.kia hamaray mua’shray mai moujood jihalat,bhook,muflisi,adam bardhasht,ta’asoob,keena parwari or ghutan ka qamye qulla koi amreeki safeer a kar karay ga ya phir yeh hamari khud ki zimmay dari hai.us ka dil is baat ki gawahi deta agar moujooda siyaah nizaam tabdeel hojaye tou kitnay hi zaheen noujawan apnay hi mulk mai samar raseeda hojaye.magar kayen saaloon par muheet tarz e amal ko tabdeel karna koi asaan kaam tou hai nahi? faizan apnay aap ko unhi panchiyoon ki tarnha bai bus mehsoos karta jo jungle mai lagi thori si aag dekh kar apnay shajr say dur kahin nikal jatay hain.faizan reh reh kar sochta agar us kay apnay mulk mai khush haali hoti tou kia kabhi woh saath samandar par aata? or aesay kayen saray chubtay hue sawal uski nafsiyat mai paiwast ho kar rehgaye.faizan pay ab yeh falsafa ashkaar honay laga tha kay zindagi mai settlement [theraao] naami koi chirhya apna wajood nahi rakti.yeh sab dil ko behlanay kay dhakooslay hain jo insaan apnay aap ko diye jata hai.jab tak goosht poost ka yeh insaan zinda hai,issay musalsal apni quwat e iradhi ka imtehaan dena hai.faizan ka yeh maan’na tha kay mashraqi tehzeeb adha teetar or aadha batair ban kar reh gaye hai.aik taraf tou noujawan tabkay ko maghribi tarz kay academic ki pabandi karnay ka kaha jata hai magar dosri taraf unkay sharayee haq azdawaji rishtay ko bai inteha mushkil bana dia gaya hai.shayad inhi dil mai palnay wali jins e mukhalif ki fantasies ki waja say aksar noujawan maghrabi mumalik ka rukh kartay hain.faizan ko ab mail jol kay baad ehsaas hogaya tha kay facebook Dps kay andar ainoo’n mai khari gulaabi rung ka iphone liye pout banati yeh gori ma’amain shakhsi eitbaar say kis qadar kamzoor or bai murawwat shai hai.
khair zindagi yunhi guzarti rahi.hansnay or ronay kay mouqaam aatay rahay.achay or buray logoon say mulaqaat ka silsila jari raha.subha shaamoon mai or shaam raatoon mai dhal gaye.faizan ab nihayat khoobsurat manazir kay darmiyaan apni tasweerain utarwa kar ghar waloon or dostoon kay saath share karta rehta lakin wasooq say yeh nahi keh saktay kay woh afsurda tha ya mutmaeen.bazahir woh tamaam tasweeroon mai muskurata hua hi nazar aata tha un dekhnay waloon ko jinhay abroad janay ka shouq hota hai or dil mai kisi gori ma’am ki khuwahish.
Author : Zubair Siddiq
*Note : The purpose of this story is not to stop you from going abroad for higher studies and subject specialization. Author only wanted to inform you about kind of concrete and emotional trouble most of the pupil face while settling down in unfamiliar countries. Going abroad is just a chance of getting success but not the ultimate path of win. Author do advise only genuine student should go abroad with clear mind of obtaining degree and exposure that is not available in your native country.
**Note : Amjad dettol is just a fictional philosopher character. He has tremendous ideology towards life and its complexities.
Forms of Nazm [defination of each subcategory]
Doha : urdu shayari ki aik bait jis ka har misra’a do tukroon par mushtameel hota hai
Geet : naghmay kay liye likhay janay walay bol
Hazal : mizahya, fahash asha’ar, muzhik kalam
Hijv : asha’ar jo kisi ki aib joye ya mazaq urhanay kay liye likhay jayen
Qata’a : chand hum qafia asha’ar ka majmua’a jo musalsal or aik hi mouzu par hoon
rubai : char misroon ka qata’a jo behr hajaz kay muqararah owzaan mai say kisi mai ho
Wasokht : nazm jis mai aashiq mehboob say uski bai wafaee o bai parwayee ka shikwa or tark e mohabbat par amadgee zahir karta hai
Sehra : shaadi ya dulha kay sehray pay likhi janay wali nazm
masnavi : woh nazm jo abyaat par mushtameel ho,yani aik hi behr mai har bait ka qafia juda or bait kay dono misra’y hum qafia hoon
kafi : ilaqayee shayari ki aik ghana’ie sinf jis ki koi makhsoos haie’t nahi,umooman chandon ya baitoon ki shakal mai arfana’an kalaam
manqabat : tareef,touseef sana’a, ba’eesay imtiayaz, ehl e bait ya oliya karaam ki shan mai likhay janay walay asha’ar or nazm
Qawwali : sufia karam ki shan mai likhay janay walay asha’ar or kalam
Musaddas : woh nazm jis mai chai chai misroo’n kay band hoon [chai= 6]
Qasida : aik hi behr o qafia mai taveel madheeya nazm
Hamd : khuda ki tareef mai likhay janay walay alfaaz
Naat : woh kalaam jo rasool e khuda Hazrat Muhammad [S.A.W] ki touseef o sana mai likha jaye
Munajat : sargooshi, ilteja, khuda say khitaab, dua’ya or hamdiya nazm
Madah : tareef karnay wala, sana khuwa’n, sataeesh mai likhay janay walay alfaaz
Mukhammas : woh nazm jis mai paanch paanch misroo’n kay band hoon
Marsia : shohda’ye karbala ki shaan or ehwaal mai likhay janay wali nazm
Noha : girya’a wazari, mata’mee ashaar, shohda’ye karbala kay gham mai likhay janay walay alfaaz
Soz : runj o aalam, waqaya karbala ki takaleef kay baray mai asha’ar
shehr e a’ashoob : shehr ki taba’hee ya is par likhi janay wali nazm
Salam : ehl e bait ki shaan mai manqabat, mehfil e milaad mai rasool e arabi Hazrat Muhammad [S.A.W] ki shaan mai adab say kharhay hokar parhay janay walay naatiya kalmaat
Research by : Zubair Siddiq
#TimeUrdu signature ghazal [I]
“Tazad e Ravish”
shoukhi e shabnam mai gulaab mutra hai
yeh jo haqeeqat hai tou bus aik qatra hai
nafrat mai kuch bhi tou nuqsan e dil nahi
yeh jo mohabat hai tou bus aik khatra hai
khawhishoon ki bhala kab umer dhalti hai
yeh jo qalb hai pandra,soula ya sathra hai
dolat e jamal say labraiz hai sarapa’a tera
faqeer kay liye tou aik jhalak ka fitra’a hai
kuch bhi na as’r hua taqreer ka aalam pay
mudda e rooh tou bus faqat aik fiqraa hai
iss basti main kiun kar badnaam hai zubair
albatta’a guftugu mai thora saaf suthra hai
Poet : Zubair Siddiq
Timeاردو 